街邊斬個叉燒飯 - 新城宏昌燒臘

去大埔，去探太太的外婆。中午，我們就慣性地，一人買一個飯盒，上到去自己吃自己。免得老人家洗碗，同特登整野俾我地食。而這一次，我路過這一間小時候斬開料的其中一間燒臘檔，《新城宏昌燒臘》，買盒燒味飯，去太太的外婆家，食。

細細個行富善街一帶，這一個位置已經係燒臘檔了。雖然，這不是我兒時必食的燒臘檔，當然也不是區內高排名的。但，一旦我們去開富善街買餸，最就腳就係佢。所以，我對這店都有少少印象架。

那天，中午的一盒飯就是叉油雞飯。叉燒，看似好瘦，但食落又真係夠腍的。油雞的豉油味濃厚，而且店方給了我雞翼的位置，味道更香天滑。再者，蔥油同叉燒汁都是味道濃郁兼重，直接令到這一盒飯，加分。

等斬叉燒時，旁邊一盒盒預先包好的味部小食深深地把我吸引住了。當日，我看中一盒，是一盒兩隻的蜜汁雞骴。厚厚肉的燒雞骴，甜甜的味道，每一口都充滿蜜味。香港式的蜜汁燒雞骴，深係燒臘檔先有架咋。

燒味飯一盒，份量足。兩隻甜甜的雞骴，也是份量足。來這些路邊燒臘檔買野食，份量夠已經是滿足。這些會斬大大舊叉燒俾我地既燒臘檔，好少會唔好食。最多只係用既肉唔係咁靚架姐。

燒臘檔名稱：新城宏昌燒臘

地址：大埔安富道17號地舖