拮魚蛋 - 屯門 ‧ 景峰《匯景美食》

大家都知道，因為信仰既關係，我間唔中都會出現在屯門。以前就個個星期六都去，現在，就主要在初一同十五先會去。所以，好多時都係一放工，就趕死趕命咁入屯門。時間通常是六點幾七點，有時真係餓到頂唔住架。口痕時，就會想到要食少少野才報到，而巴士站旁的《匯景美食》就是我拮串魚蛋小食，快快趣食小小野既好地方。

這一間《匯景美食》就係一間好典型的拮魚蛋店。魚蛋，一串串既小食，內臟同肉食都有齊，旁邊仲有一個賣齋滷味既小櫃，絕對是應有盡有的一間食物小店。幾乎樣樣齊，但差在沒牛雜。

初一來，要了兩串東西。算是第一次報導此店，當然係由魚蛋開始。一串滿滿的，足料有七粒。雖然，未必係最正既陳皮魚蛋，但粒粒結實，口感絕對是實在。再者，他們的辣醬夠晒香口，是很惹味的一串。

另外的一申，是鴨腎。爽口，甚至可以用爽脆來形容。本身已經熟，要時再放入魚蛋水再浸返熱，加上辣醬，爽口，香脆，爽脆。

十五來，也要了兩串東西。這次真的是肚餓了，所以，我要了一條烤司華力腸。大大條的司華力腸，烤是最好吃的了。外皮夠晒脆，肉香，整條腸都好香。是名符其實的香腸。

另一串，是充滿了骨膠原的豬頭肉。豬頭的部位，最好食的，莫過是豬耳了。外層的豬皮既腍又香滑，軟綿度剛剛好，吃入口又不會過份地起膠。咬耳仔軟骨果下，直頭開心到 hi hi 聲。

兩次來，都發現這店是人山人海的。位置好，好多人一落車從九龍、荃灣回來，拮返串野食，開心地食住返屋企，絕對是人生既一大樂事啊。

小食店名稱：匯景美食

地址：屯門青翠徑9號多寶大廈地下29號舖