在沙田第一城內有《美好》的一餐

要買 "飛仔" 再自己出去取食物的非連鎖快餐店，已經少之又少。可能在工廠區既舊式飯堂會比較容易找到，但在住宅區、商業區，真係難得一見。然而，在歷史似是悠久但看起仔又唔係好久既沙田第一城，有一間名字叫《美好》的食店。就是保留這類先購票，後自取的食店。是一間介乎茶餐廳同快餐店之間的港式食店。兩次在第一城辦好事，我都專程來，快快趣食個快餐店式既茶餐廳午餐。

這一間《美好》，是好典型的一家舊式快餐店。印象中，我細細個已經有幫襯了，印象是俾完錢之後等嗌咪的。不過，時代進步了，今時今日，我地睇電腦屏同埋聽廣播。一見到自己張飛既冧把、或一聽到自己張飛冧把既廣播，就可以出去攞野食啦。

第一天來，我要了一份干炒雞扒意粉。雖然是快餐，但也能做到茶餐廳式的即叫即炒，這就是舊式買 "飛仔" 既港式快餐店才有的好出品。味道本身已經足夠，加點辣醬去食，是十分惹味的。而且，這是一份肉多多的炒意粉，是學生哥的浪漫。

隔了一段日子，我又出現係第一城了，想快快穀坐低食個 lunch。我又想起《美好》。

這一次，我選擇同樣是學生哥的浪漫食品之一，蔥油雞扒蛋飯。脆皮的雞扒，甜甜的醬油，再加上香口的煎蛋同更香口的蔥油。是一個既美味又邪惡的一份午餐是香港式餐飲的精神所在。

兩次來，我都選擇熱奶茶。這兒的奶茶，算是普普通通。感覺雖然是良好，但沒有出眾的感覺。當一杯慣例的跟餐奶茶，不過不失而已。

能保留到傳統特色，也保持到好味道。我不得不說，我喜歡這樣的《美好》餐廳。每次用完餐，都感覺到有《美好》的一天。

餐廳名稱：美好 (Super Taste)

地址：沙田銀城街1-2號置富第一城1樓109-110號舖