東橋餐廳 - 筲箕灣街坊的食事処

譚公誕那天，阿女上午係東大街表演完，下午就是自由活動了。由於，成條東大街已經是人山人海，我們也無需要留到整個儀式結束，所以，就離開東大街，先搵地方醫肚，再慢慢地做個港島區半日遊。當日，我們搵食搵到來筲箕灣道，眼見這一間《東橋餐廳》有野啱名仔食，也有野啱老婆食，而且全場爆滿，極具人氣，咁我們一家人就決定黎呢間又似茶餐廳，又似日式餐廳，又似豉油西餐廳的食事処午餐。

中午，大家吃的當然是午市套餐。而這餐廳的跟餐例湯，有三款。其中一款是忌廉湯。其實，這是一碗好傳統的冇乜料忌廉湯。雖然夠 creamy，但內心就得幾條菜，味道就靠雞粉帶出，笠係咁。

另一個是羅宋湯，夠香，但不夠辣。用料似乎是十足，但煲埋一大煲，變相，端出來的湯就沒有多少的湯料。總之，味道十足就可以叫好啦。

太太說明了是素食者，店方特意為她弄了一個素食版的麵豉湯。純麵豉，連海帶都沒有。店方說是特別製，沒有落鰹魚汁的素食麵豉湯。同樣地味道濃香，太太感開心。

當日，太太點的是日式咖喱野菌飯。很香的日式咖喱汁汁，配有金針菇、雞骴菇等等，也令到整個咖喱充滿了菇香，濃香的素食飯，很令人開心。

我同仔仔就一人一份鐵板牛扒，我要五成熟，仔仔要七成熟。出到來的扒，香味十足。我同阿仔對比過，他的七成熟真的比我份五成熟冇咁紅。牛扒香，薯條香，再加上鐵板熱辣辣，再加上只係60蚊左右，大家都吃得非常開心。

而就是因為太開心，而且檯面又窄，忘了為飲品拍照了。而我可以說，這兒的奶茶，也是有水準的。最後要說的，就是我們的總評分。是一致地給的好高分。

餐廳名稱：東橋餐廳

地址：筲箕灣筲箕灣道312-322號寶福大廈地舖