Ben-Hur，這一套西語殘片令當時的香港出現了一句潮語叫做賓墟咁既場面，而這一句潮語流行了幾十年，到今時今日，一有大型人流出現的活動，或一些場面超多人的電影，好多人既口中都會冠以《賓墟咁既場面》來形容。
這一篇文章，說是不是我看見或參與了一個有《賓墟咁既場面》既宴會，而是三間冠名《賓墟》的茶餐廳。
先說九龍區，就在石硤尾邨，你會找到一間古老的茶餐廳冰室，名為 《賓墟快餐廳》。
(Photo by: mx8034)
我是在下午茶時段到訪的，所以就要了一份西多士來招待自己。
這西多，煎炸到起晒角，帶點不拘小節的一份西多，感覺其實比起裝潢到靚靚的食物更好。此店不想客人倒到成檯或搞到成手都係楓糖漿，牛油同糖都是預先落定，不過舊店的碟冇咁大，糖就直接的倒在西多的面上。只是牛油不夠多。
麵包軟，又有恰到好處的糖漿，皮脆而不燶，而且又令我吃到蛋漿的香味。賣相隨意，味道正宗，也是好。
奶茶，夠濃，不過順滑既程度就只是合格。
________________________________________________________________________________
再說，就是我在幸福邨商場找到的另一間賓墟。這是一間充滿時尚感的茶餐廳，而且仲有 facebook 專頁及一個網站。細心一看，這賓墟是石硤尾賓墟的分店，名為《賓墟餐廳》。
(Photo by: bebewawa)
幸福邨，可以說是一條比較 isolated 的屋邨，星期六的下午，即使是下午茶的時段，這賓墟依然是人山人海，的而且確，造就了《賓墟咁既場面》。
下午茶的確是只想輕輕的食，想簡單而又想一比較兩間賓墟水準，而西多士正正是一個需要功夫之作。點了餐，話口未完，一大碟西多士盛到我面前。方方整整的西多，糖漿落在旁邊，好有西餐感覺呀。這樣上檯，感覺衛生兼有少少藝術感。
要幾甜，就放幾多糖上去，中間夾層的花生醬味濃，甜，香，可是那一片牛油仔，也許是太小了。沒有把麵包煎炸過龍，蛋漿味道均勻，做得既好味又美觀。
奶茶，有黑白淡奶既杯出現也證明了這一家茶餐廳係用黑白的滑淡奶沖茶。這茶奶味濃郁，非常之creamy，可是蓋過了奶茶的滑。不用理會滑唔滑的問題，我喜歡cream一點的奶茶。
有feel，有taste，兩間賓墟，都同樣地把西多士的精髓做出。有花生味多糖漿少牛油的西多，重奶味重茶味但未夠滑的奶茶。新舊格局不一但味道相近。也就等同 Ben-Hur 同 Gladiator 既分別。
________________________________________________________________________________
仲有一間賓墟，不過就應該不是同一集團既餐廳了。該賓墟就位於屯門的大興邨。不約而同地，三間賓墟，都是屋邨茶餐廳。
(Photo by: Openrice.com)
石硤尾的是Ben Hur，幸福邨的是 Gladiator，而這一個好難找返一套有賓墟咁既場面既電影來形容他，因為這一家 《賓墟快餐廳》都是賓墟咁既餐廳。古老的程度，同石硤尾賓墟同級。
我亦是下午茶時段來到此賓墟快餐廳，而同樣地，我要了一個西多士，簡單地下午茶。
西多士，這兒做得乾乾淨淨，小小片的牛油同糖漿放在一起，一下子就混合了糖同油，十分之好，而且煎到完全的金黃，內餡有花生味，外皮脆脆地，麵包心是軟綿綿，這西多好有水準。
這下午茶茶餐原來不只是西多士咁單調，套餐包茶之外仲有一份春卷或咖喱角相伴，而我就選擇了一份較為少吃的咖喱角。咖喱角，通常都是來貨比較多，這店的油夠熱，咖喱角的皮炸得十分之脆，咖喱味道香而微辣，好香亦好有傳統的感覺，熱辣辣的食，更香更脆。
奶茶，奶味夠，茶夠滑，亦夠濃郁，是一杯很好的茶。
三間賓墟的去過了，各有各的好，各有各至的賓墟場面，而且各自有各自融合了其所屬的公共屋邨特色。而公屋區的茶餐廳，是好多好多香港人生活的一部份。石硤尾邨賓墟、幸福邨賓墟、大興邨賓墟，各自各精彩，各自有各自的賓墟場面同故事。
餐廳名稱﹕賓墟快餐廳 (石硤尾邨)
地址﹕石硤尾南昌街115號地下
餐廳名稱﹕賓墟餐廳 (幸福邨)
地址﹕長沙灣幸福邨幸福商場地下1號舖
餐廳名稱﹕賓墟快餐廳 (大興邨)
地址﹕屯門大興邨大興商場2樓5號舖
thanks for share........
回覆刪除